كفكف دموعك حبيبي يا عراق
لسه دنيانه تضوي بنورك
ولو دم أولادك الطاهر يراق
وكلهه متحزمه تهدم سورك
ابتسم ... رغم الجروح الما تطاق
يا شهم وموفي كل انذورك
لا تظن يلووك شذاذ الافاق
لو يلوث ليلهم بلورك
انته نجمة صبح تسبح بالأحداق
الشمس ما تطلع إذا متشورك
انته كعبه .. للشرف مو للنفاق
جنة والطيبين كلهم حورك
وليظمر ألك سوء عاق وابن عاق
ولا عرف كدرك ولا مكدورك
* * * * *
غلط .. حسبوهه العرب حسبة رفاق
ما دروا دمك يريع ازهورك
ولا دروا جرحك يفز باشتياق
ويّـــــه كل هندس تهل أبدورك
شارتك تكتل حبيبي يا عراق
وكفر كلمن ما يجي ويزورك
اتحاشموا كلهم على ذبحك سباق
ابخيت كلمن شچخ سيفه بزورك
حسبوّا تتعب ... يدب بيك الإرهاق
.. تموت .. وتكف عن غناها طيورك
ما دروا موتك حياة وانطلاق
ومن رمادك تفز تكمل دورك
انته عنقاء الزمان بلا فراق
والمجد يا بو الشرف ناعورك
كلهم يموتون .. وحدك أنت بـــاقِ
لان سر الكون من اجذورك
حسبوا ليل التعصّب والشّــــقاق
يطفي شمسك .. لو ينشف هورك
واهمين الماقروا كـــلّ الأوراق
ألما دروا دمك يطيب بورك
ألما دروا غيضك ألك مهرة وبراق
أترخص الدنيه وتعز استورك
ما يعرفونك حبيبي يا عراق
ولو يعرفونك تكفّـــــوا جورك
لا تبالي وبالعزم شـــدّ الوثاق
وكل شريف بيـه الشّـــعب ناطورك
آه... وشگــد مشتهي ويّــــاك العناق
امنين أبوسك سوربتني بنورك .
>> منقول >>
05 ـ 12 ـ 11
الأربعاء 6 فبراير - 8:15 من طرف 
